Bakıdakı Elmi-Tədqiqat Ağciyər Xəstəlikləri İnstitutunda müalicə alan vərəm xəstəsi Anatoli Lopatin evə yazılıb. Bu barədə Oxu.Az-a xəstənin ailə üzvləri məlumat verib.
Bildirilib ki, Lopatinin səhhəti qəfil pisləşib və o, ağır vəziyyətdə Nərimanov Tibb Mərkəzinə yerləşdirilib. Müayinədən sonra təcili olaraq Ağciyər Xəstəlikləri İnstitutunun reanimasiya şöbəsinə hospitalizasiya olunub. Diaqnoz: açıq stansiya ciyər vərəmi.
Bir ay reanimasiyada qalan xəstə sonra açıq vərəm şöbəsinə köçürülüb. Bu gün səhər həkim Polad xəstəyə tam sağalmadığı halda evə buraxıldığını bildirib. Yaxınlarının etirazlarına baxmayaraq, həkim qərarından dönməyib.
Xəstənin ailəsi açıq vərəm xəstəsinin evə yazılmasının yolverilməz olduğunu deyir: "O, ətrafındakı hər kəsi yoluxdura bilər. Həkimə dedik ki, bu adam ailəsini və ictimai nəqliyyatda başqalarını yoluxduracaq, amma bizi eşitmədilər."
İnstitutun baş həkimi Gülzar Əliyeva faktı təsdiqləyib: "Xəstə kritik vəziyyətdə gətirilmişdi, bir ay müalicədən sonra kliniki vəziyyətdən çıxarıldı. Dünya təcrübəsinə görə, xəstə bir aydan sonra evdə müalicə almalıdır. Vərəm 6 ayda sağalır. Yaxınları ona qayğı göstərmək istəmir, bizim isə onu saxlamaq imkanımız yoxdur."
