Ümumdünya Şəhərsalma Forumunun 13-cü Sessiyası (WUF13) çərçivəsində xarici media nümayəndələri üçün Bakının mədəni və tarixi məkanlarına mediatur təşkil edilib.
Medianın İnkişafı Agentliyi və WUF13 Azərbaycan Əməliyyat Şirkətinin birgə təşkilatçılığı ilə keçirilən tura İtaliya, Çin, Rusiya, Hindistan, Keniya, Tunis və digər ölkələrdən jurnalistlər qatılıb.
Tur mayın 20-də başlayıb. İştirakçılar əvvəlcə Ağ şəhər layihəsi ilə tanış olublar. Onlara ekoloji regenerasiya və müasir urbanizasiya barədə məlumat verilib.
Marşrut Qarabağ atları meydanı, Heykəllər kompleksi, Su pavilyonu, Fəvvarələr meydanı parkı və Zaman meydanını əhatə edib.
Daha sonra qonaqlar Heydər Əliyev Mərkəzini ziyarət ediblər. Onlara mərkəzin memarlığı, sərgiləri və mədəni layihələri təqdim olunub.
Ardınca İçərişəhərə gedən jurnalistlər Qız qalası, Şirvanşahlar sarayı və digər abidələr haqqında məlumat alıblar.
Jurnalistlər turun yüksək səviyyədə təşkil olunduğunu və Bakının tarixi ilə müasir şəhərsalma modelinin onlarda dərin təəssürat yaratdığını bildiriblər.
