Panamanın mənzil və ərazi planlaşdırılması naziri Xayme Xovane Kastilyo WUF13 çərçivəsində Oxu.Az-a açıqlamasında bildirib ki, Azərbaycanın köçkünlərin qayıdışı ilə bağlı səyləri onların diqqətini çəkib.
Nazir qeyd edib ki, Panamanın əsas iqtisadi fəaliyyət sahələrindən biri sudur. Xüsusilə, Panama kanalından keçən gəmi hərəkətinin idarəolunması birbaşa su resurslarından asılıdır. Lakin ölkə əhalisinin hamısını içməli su ilə təmin etməkdə hələ də çətinliklər yaşayırlar.
O, tədbirdə iştirak məqsədinin həm Panama təcrübəsini bölüşmək, həm də Azərbaycan və digər ölkələrin təcrübəsini öyrənmək olduğunu vurğulayıb: "Açılış mərasimində Prezidentin çıxışından yadda qalan əsas məqamlardan biri böhran dövrlərində öz yurdlarını tərk etməyə məcbur olmuş insanların yenidən həmin ərazilərə qayıtması üçün göstərilən səylər oldu. Bu, bizim üçün də çox vacib məsələdir. İstəyirik ki, ölkələrin regionlarında yerləşən icmalar yenidən formalaşsın, həmin ərazilər boş və tərk edilmiş torpaqlara çevrilməsin".
Xayme Xovane vurğulayıb ki, Panamada əhalinin təxminən 50 faizi paytaxtda yaşayır və bu, urbanizasiya, infrastruktur və su təchizatı sahələrində ciddi problemlər yaradır. Ərazi planlaşdırılması hidroqrafik hövzələr əsasında aparılmalıdır. O, ərazi planlaşdırılması prosesinə çay hövzələrinin daxil edilməsinin vacibliyini qeyd edib.
Nazir cəmiyyətdə kollektiv məsuliyyət hissinin yenidən bərpasının əhəmiyyətini də vurğulayıb: "İnsanlar birgə yaşamağı və onları yaşadan resursları qorumağı unudublar. Su insan hüququdur, lakin içməli suyun əhaliyə çatdırılması həm də xammalın keyfiyyəti və həcmindən asılı olan sənaye prosesidir. Yeraltı su ehtiyatlarını və sutoplama hövzələrini qorumasaq, nə içməli suya çıxışı, nə də qida təhlükəsizliyini təmin edə bilərik. Kənd təsərrüfatı və heyvandarlıq su resurslarından birbaşa asılıdır".
