BMT-nin Məskunlaşma Proqramının (UN-Habitat) icraçı direktoru Anaklaudia Rossbax, inkişaf bankları olmadan müasir çətinliklərin öhdəsindən gəlməyin mümkün olmadığını vurğulayıb.
Oxu.Az-ın məlumatına görə, bu sözlər WUF13 çərçivəsində keçirilən "Mənzil tikintisinin qlobal maliyyələşdirilməsindən əlçatan yaşayış yerinin təmin edilməsi üzrə yerli təşəbbüslərə: Qlobal inkişafın və submilli maliyyələşmənin imkanlarından istifadə" adlı tədbirdə səsləndirilib.
"Maliyyələşdirmənin azaldılması, xüsusilə humanitar sektorda, inkişafın nə qədər vacib olduğunu göstərdi. Beynəlxalq ictimaiyyət humanitar yardımdan davamlı inkişafa keçiddə uğursuz oldu", - deyə o qeyd edib.
Rossbax əlavə edib ki, bu bir növ həyəcan siqnalıdır: "Əgər biz BMT və UN-Habitat olaraq inkişaf sahəsində iştirakımızı genişləndirmək istəyiriksə, yalnız qida və həyat xilas etməklə kifayətlənməməliyik. Bu, təməldir, lakin irəli getməsək, cəmiyyətlər inkişaf edə bilməyəcək".
Direktor qeyd edib ki, inkişaf bankları olmadan davamlı inkişaf məqsədləri, iqlim gündəliyi və yeni şəhər gündəminin çətinliklərinin öhdəsindən gəlmək mümkün deyil.
