Rusiya nümayəndəsi Nikita Tsukin WUF13-ün gənclər arasında qarşılıqlı əlaqə üçün əvəzolunmaz bir platforma olduğunu vurğulayıb.
Bunu Ümumdünya Şəhərsalma Forumunun 13-cü sessiyasında (WUF13) iştirak edən Rusiya Federasiyasının nümayəndəsi Nikita Tsukin Oxu.Az-a açıqlamasında bildirib.
Onun sözlərinə görə, tədbir zamanı iştirakçılar Azərbaycan nümayəndələri ilə fikir mübadiləsi aparıblar: "Forum yüksək səviyyədə təşkil olunub. Çoxlu maraqlı eksponatlar var. Könüllülər və təşkilatçılar həmişə kömək etməyə hazırdırlar".
Tsukin WUF13-ün gənclər arasında böyük maraq doğurduğunu qeyd edib. O, Azərbaycan nümayəndələrinin təcrübələrini bölüşdüklərini, Rusiya tərəfinin isə əməkdaşlıq ideyaları təklif etdiyini bildirib: "Ümid edirik ki, gələcəkdə gənclər sahəsində əlaqələri inkişaf etdirəcəyik".
Rusiya təmsilçisi əlavə edib ki, ölkəsinin gənclərinin Azərbaycanla uzun müddətli əlaqələri var: "Yaxın qonşularımızla çox isti münasibətlərimiz var və tikinti, sosiallaşma və ətraf mühit məsələlərində birgə təşəbbüslərdə maraqlıyıq".
O, həmçinin COP29-u xatırladaraq, rusiyalı iştirakçıların müsbət təəssüratlarla qayıtdığını və yeni əlaqələr qurduğunu qeyd edib.
