Ümumdünya Şəhərsalma Forumunun (WUF13) Bakıda keçirilən 13-cü sessiyasının beşinci günü yekunlaşıb.
Forum bu gün də işinə müzakirələrlə davam edib. Gün ərzində müxtəlif mövzularda panellər keçirilib.
“Azərbaycanın ilk milli dayanıqlılıq standartının hazırlanması” panelində çıxış edən Prezidentin iqlim məsələləri üzrə nümayəndəsi Muxtar Babayev bildirib ki, WUF13 Azərbaycanın dayanıqlı urbanizasiya prioritetlərini nümayiş etdirir.
Maliyyə nazirinin birinci müavini Anar Kərimov vurğulayıb ki, Azərbaycan işğaldan azad edilmiş ərazilərin bərpasına 10 milyard dollardan çox vəsait yönəldib.
Ukrayna səfiri Yuri Qusev Xarkovun dirçəlişi üçün dəstəyə görə Bakıya təşəkkür edib.
Kəlbəcərdə Prezidentin xüsusi nümayəndəsi Bəşir Hacıyev bildirib ki, beş kəndin layihələndirmə işləri tamamlanıb, 222 min kvadratmetr ərazi minalardan təmizlənib, 10-dan çox su elektrik stansiyası istifadəyə verilib.
Forum mayın 17-də başlayıb, rəsmi açılış mayın 18-də olub. WUF13 BMT-nin Məskunlaşma Proqramı və Azərbaycan hökumətinin birgə təşkilatçılığı ilə keçirilir. Forum sabah yekunlaşacaq.
