Konqonun şərqində yerləşən İturi əyalətində yeni Ebola epidemiyası nəticəsində azı 80 nəfər həyatını itirib.
Associated Press-in məlumatına görə, xəstəlik ocaqları Rvampara, Monqvalu tibb zonalarında və əyalətin inzibati mərkəzi Buniya şəhərində qeydə alınıb. Afrika Xəstəliklərə Nəzarət və Profilaktika Mərkəzi 246 yoluxma halının aşkarlandığını bildirib.
Mütəxəssisləri narahat edən əsas məqam Bundibucyo ştamının əvvəlki epidemiyalardan fərqlənməsidir. Mövcud vaksinlər Zair ştamına qarşı hazırlanıb, bu da mübarizəni çətinləşdirir.
Yoluxma ocaqları Uqanda və Cənubi Sudan sərhədlərinə yaxındır. Yüksək miqrasiya və mədən fəaliyyəti vəziyyəti gərginləşdirir.
Uqanda Səhiyyə Nazirliyi Konqo vətəndaşının Kampalada eyni ştamdan öldüyünü açıqlayıb. Yerli yayılma qeydə alınmayıb.
Bu epidemiya Konqoda 1976-cı ildən bəri 17-ci Ebola epidemiyasıdır.
