Misli Premyer Liqasının 32-ci turunda "Şamaxı" - "Turan Tovuz" matçı (3:2) baş tutub. Qonaq komandanın baş məşqçisi Kurban Berdıyev mətbuat konfransında jurnalistlərin suallarını cavablandırıb.
Kurban Berdıyev oyunun gedişatını dəyərləndirib: "İlk hissədə yaxşı oynamadıq. Hakim barədə sual verməyin, bu haqda danışmayacağam. İkinci hissədə aqressiv çıxış etdik və hesabı bərabərləşdirdik. Amma sonra yenə qol buraxdıq".
Baş məşqçi komandanın avrokuboklara vaxtından əvvəl vəsiqə qazanmasının oyunçularda arxayınlıq yaratdığını etiraf edib. "İlk hissədə diqqətsizlik var idi. İkinci hissədəki oyuna görə futbolçulara təşəkkür etdim, gedişatı dəyişdik. Sonda qol buraxmasaydıq, daha yaxşı olardı".
Müdafiə xəttinin gec reaksiyası ilə bağlı tənqidlərə münasibət bildirən Berdıyev: "İlk hissədə bu iradla razılaşmaq olar. Rəqib də aqressiv idi. İkinci topları gec götürürdük. Fasilədən sonra bunu aradan qaldırdıq. Hər iki komandanın aqressivliyi hakimliklə bağlıdır".
Transfer planları barədə: "Yeni oyunçular üçün axtarışlar davam edir, yekun nəticə yoxdur. Rəhbərliklə say barədə danışmışıq. Hər şey tapacağımız keyfiyyətli oyunçulardan asılıdır".
