Mayın 20-də Azərbaycanın Rumıniyadakı səfirliyinin təşkilatçılığı ilə Buxarestdəki "Marriott" mehmanxanasında Müstəqillik Gününə həsr olunmuş təntənəli tədbir keçirilib.
Tədbirdə Rumıniyanın dövlət xadimləri, deputatlar, senatorlar, diplomatik missiyaların rəhbərləri, elm və mədəniyyət xadimləri, KİV nümayəndələri, türk və tatar icması, İran azərbaycanlıları və həmvətənlərimiz iştirak edib.
Səfir Qüdsi Osmanov çıxışında 1918-ci il Azərbaycan Xalq Cümhuriyyətinin əhəmiyyətindən, müstəqilliyin bərpasından, Heydər Əliyevin xidmətlərindən və Prezident İlham Əliyevin rəhbərliyi ilə qazanılan uğurlardan danışıb. O, 2025-ci ildə Vaşinqtonda imzalanan sənədin regionda sülhə zəmin yaratdığını bildirib.
Rumıniya Senatının sədri Mirça Abrudean 28 may 1918-ci il tarixini vurğulayıb, Rumıniyanın Azərbaycanın müstəqilliyini tanıyan ikinci ölkə olduğunu xatırladıb. O, strateji tərəfdaşlıq əlaqələrindən və birgə enerji layihələrindən söz açıb.
Rumıniya Prezident Administrasiyasının dövlət müşaviri Vlad İonesku Heydər Əliyevin 1995-ci il səfəri ilə təməli qoyulan əməkdaşlıqdan, Cənub Qaz Dəhlizi və yaşıl enerji layihələrindən danışıb.
Xarici İşlər Nazirliyinin dövlət katibi Ana Kristina Tinka Azərbaycanın geostrateji mövqeyini, 35 illik diplomatik əlaqələri və sülh prosesinə dəstəyi vurğulayıb.
Parlamentdə Azərbaycanla dostluq qrupunun rəhbəri Marian Neakşu Azərbaycanı Rumıniyanın ən yaxşı dostu adlandırıb, qarşılıqlı səfərlərin əhəmiyyətini qeyd edib.
Keçmiş prezident Emil Konstantinesku Heydər Əliyevlə dostluğundan, İpək Yolunun bərpası layihələrindən danışıb.
Tədbirdə işğaldan azad olunmuş ərazilərin bərpası, mina problemi və turizm potensialını əks etdirən fotosərgi nümayiş olunub. Sonda Azərbaycan milli mətbəxi təqdim edilib.
