Avropa İttifaqı (Aİ) və ABŞ rəsmiləri ticarət müqaviləsinin qanunverici bazasının tənzimlənməsi ilə bağlı ortaq razılığa gəliblər.
Oxu.Az xəbər verir ki, bu barədə Avropa Xalq Partiyası fraksiyasının danışıqlardakı nümayəndəsi, Avropa Parlamentinin deputatı Jelana Zovko sosial şəbəkə hesabında paylaşıb.
"Biz razılığa gəldik! Transatlantik ticarət böhranının təhlükəli şəkildə kəskinləşməsinin qarşısı alındı. Atlantik okeanının hər iki sahilindəki Avropa müəssisələrinin, investisiyaların və milyonlarla iş yerinin təhlükəsizliyi təmin olundu", - deyə o qeyd edib.
J. Zovko vurğulayıb ki, o, prosesin əvvəlindən Aİ-nin ABŞ ilə heç bir ticarət müharibəsinə dözə bilməyəcəyini bildirib. Deputatın sözlərinə görə, qeyri-sabitlik dövründə sadiq dostlar düşmənə çevrilməməli, əksinə tərəfdaşlıqlarını qorumalıdırlar.
Xatırladaq ki, mayın əvvəlində Aİ ticarət komissarı Maroş Şefçoviç və ABŞ ticarət nümayəndəsi Ceymison Qrir arasında Parisdə keçirilən və ABŞ-ın Avropa avtomobillərinə tətbiq etdiyi rüsumlarla bağlı müzakirələr nəticəsiz qalmışdı. Şefçoviç əvvəlki şərtlərə qayıtmağı təklif etsə də, Qrir ABŞ-ın 25%-lik rüsum qərarını ləğv etməkdən imtina etmişdi.
