Rusiyalı tanınmış rəssam Nikas Safronov Misirə səfəri zamanı piramidalardan birində azıb. Onu ölümün pəncəsindən isə balaca bir pişik xilas edib.
Oxu.Az xəbər verir ki, rəssam öz "Telegram" kanalında başına gələn bu qeyri-adi və maraqlı əhvalatı paylaşıb.
N.Safronovun sözlərinə görə, o, Misirin keçmiş prezidenti Hüsnü Mübarəkin rəsmi dəvəti ilə onun portretini çəkmək üçün bu ölkəyə yollanıb. Lakin son anda dövlət başçısı təcili olaraq ölkə xaricinə uçmalı olub. Boş vaxtından səmərəli istifadə etmək istəyən rəssam turistlərin nadir hallarda baş çəkdiyi qədim bir piramidaya yollanıb. Lakin içəridə hərəkət edərkən səhv yönə tərəf gedib və nəticədə labirintlərdə azıb.
"Sürücü məni piramidanın yanına gətirdi və çöldə gözləyəcəyinə söz verdi, mən isə içəri girdim. Lakin daxildə səhv istiqamət seçdiyimi və azdığımı anladım. Tunellər bir-birinə olduqca bənzəyirdi, geri qayıtmaq üçün heç bir nişanə və işarət yox idi. Sanki zaman dayanmışdı, hətta saatımın əqrəbləri belə irəliləmirdi. İnsan belə vəziyyətdə qəribə bir hiss keçirir - artıq situasiyaya nəzarət edə bilmirsən, sadəcə mövcud olursan.
Mən saatlarla daxildə gəzdim və artıq reallıq hissimi itirirdim. Gücümə və suyuma qənaət etməyə başladım. Düzünü desəm, ümid belə artıq yavaş-yavaş məni tərk edirdi. Birdən qaranlıqdan bir miyoldama səsi eşitdim. Əvvəlcə mənə elə gəldi ki, susuzluqdan xəyal görürəm. Amma səsin gəldiyi tərəfə getdim və kiçik bir pişik balası gördüm. O mənə dünyadakı ən doğma canlı kimi göründü. Pişik irəli qaçdı, mən də onun ardınca addımladım. Bir müddət sonra qarşıda gün işığı peyda oldu. Beləliklə, mən piramidadan çıxa bildim", - deyə rəssam qorxulu anları xatırlayıb.
Minnətdarlıq əlaməti olaraq rəssam həmin heyvanı özü ilə birgə Moskvaya aparıb və ona "Kleopatra" adını qoyub.
"Sonradan məlum oldu ki, sürücünün günahı və koordinatları səhv deməsi ucbatından məni düz üç gün ərzində tapa bilməyiblər. Aidiyyəti qurumlar məni tamamilə fərqli bir ərazidə axtarıblar. Mən yerli rəsmilərə yalnız bir şey dedim: bu pişik balasını özümlə aparmağa icazə versələr, heç kimdən şikayətçi olmayacağam. Heyvan dişi olduğu üçün adını "Kleopatra" qoydum. Hərdən düşünürəm ki, o zaman baş verənlər sadəcə möcüzəvi bir xilas deyildi, bu, həqiqətən də ilahi bir lütf idi.
Mübarəkin portretini çəkə bilməsəm də, düzünü desəm, həmin Misir səfərindən gözlədiyimdən qat-qat daha çox şey qazandım", - deyə Nikas Safronov fikirlərini yekunlaşdırıb.
