Dünyanın bəzi ölkələrində anomal isti hava şəraiti müşahidə olunur. Belə havalarda smartfonlar həddindən artıq qızma riski ilə üz-üzə qalır.
Rusiyalı kiberekspert Aleksandr Tokarenko KP.ru-ya müsahibəsində smartfonun həddindən artıq qızdığını göstərən əsas əlamətləri açıqlayıb.
Onun sözlərinə görə, dörd əsas əlamət var. Birincisi, ekranın parlaqlığı azalır və ya avtomatik dəyişir. İkincisi, tətbiqlər adi haldan daha gec açılır. Üçüncüsü, ekranda kritik temperatur barədə xəbərdarlıq mesajı görünür. Dördüncüsü, korpus həddindən artıq qızaraq toxunarkən narahatlıq yaradır.
Tokarenko bildirib ki, smartfon məişət istifadəsi üçün nəzərdə tutulub, ekstremal temperatur şəraitində işləmək üçün hazırlanmayıb. Telefonu hətta beş dəqiqə belə günəş altında, avtomobildə və ya pəncərə önündə saxlamaq olmaz.
İsti havalarda telefonla uzunmüddətli danışıq zamanı simli qulaqlıqdan istifadə etmək tövsiyə olunur. Ucuz plastik üzlüklərin çıxarılması da məsləhət görülür.
Ekspert smartfonu "xalq üsulları" ilə soyutmağın təhlükəli olduğunu vurğulayıb. Qızmış telefonu soyuducuya qoymaq və ya soyuq suya salmaq qətiyyən doğru deyil, çünki temperaturun kəskin dəyişməsi daxili komponentləri sıradan çıxara bilər.
