Fransanın dövlət borcu kritik həddə çatıb. Sabiq baş nazir Eduar Filipp bu problemi həll etmək üçün təkcə büdcə xərclərinin azaldılması deyil, həm də bütün vətəndaşların səylərinin birləşdirilməsi lazım olduğunu bildirib.
"Borclanma sadəcə fəlakətdir", - deyə Filipp tərəfdarları qarşısında çıxışında vurğulayıb. O, sağ və sol siyasi düşərgədən olan rəqiblərini problemi yetərincə qiymətləndirməməkdə günahlandırıb.
Filipp büdcə kəsirini aradan qaldırmaq üçün xərclərin azaldılması ilə yanaşı, cəmiyyətin bütün təbəqələri arasında məsuliyyətin bölüşdürülməsini planlaşdırdığını deyib. "Ədalətli, birgə və zamanla bölüşdürülmüş səylər tələb edəcəyəm", - o qeyd edib.
Sabiq baş nazir işçi peşələrini qoruyacağını və artıq kifayət qədər vergi ödəyən şirkətlərə əlavə vergi tətbiq etməyəcəyini bildirib. Sosial xərclərin azaldılması və bəzi vergi güzəştlərinin ləğvini vacib sayır.
Fransanın Milli Statistika İnstitutunun məlumatına görə, dövlət borcu 3.5 trilyon avronu keçib - ÜDM-in 117.5%-i. Faiz xərcləri 2026-cı ildə 59 milyard avroya, 2028-ci ildə isə 77 milyard avroya çatacaq.
