Ermənistanın baş naziri Nikol Paşinyan “Beynəlxalq Sülh və Rifah naminə Tramp Marşrutu” (TRIPP) layihəsi üzrə dövlətlərarası sazişin hazırlanmasının yekun mərhələdə olduğunu bildirib.
Oxu.Az TASS-a istinadən xəbər verir ki, Paşinyan brifinqdə deyib: “Paralel olaraq iki proses gedir: ərazinin öyrənilməsi və bəzi infrastrukturların təmiri, həmçinin sazişin yekunlaşdırılması üzrə hüquqi işlər. Biz mümkün qədər tez imzalamaq istəyirik.”
2025-ci il avqustun 8-də Vaşinqtonda ABŞ Prezidenti Donald Trampla görüşdən sonra Azərbaycan Prezidenti İlham Əliyev və Paşinyan birgə bəyannamə imzalayıblar. Layihə “TRIPP” adlanır və Naxçıvanla Azərbaycanın digər hissələri arasında nəqliyyat əlaqələrini nəzərdə tutur.
