Türkiyə və Qazaxıstan arasında mühüm sənədlər imzalanıb. Prezidentlər Qasım-Jomart Tokayev və Rəcəb Tayyib Ərdoğanın rəhbərliyi ilə keçirilən görüşlərin yekunu olaraq Əbədi Dostluq və Genişləndirilmiş Strateji Tərəfdaşlıq Bəyannaməsi qəbul edilib.
İmzalanan sənədlər sırasında mülki işlər üzrə hüquqi yardım protokolu, mədəniyyət mərkəzlərinin təşkili sazişi, investisiyaların təşviqi və mühafizəsi sazişi yer alır. Həmçinin TAV Holdinq ilə investisiya müqaviləsi, Abai-Akif proqramı üzrə niyyət memorandumu imzalanıb.
Türkiyənin Maarif Vəqfinə məxsus iki məktəbin açılışı, TRT ilə Qazaxıstan Prezidentinin TV və Radio Kompleksi arasında əməkdaşlıq memorandumu da sənədlər sırasındadır. Çoxprofilli xəstəxana inşasının maliyyələşdirilməsi, neft-qaz sahəsində əməkdaşlıq sazişləri imzalanıb.
İstanbul Maliyyə Mərkəzi ilə Astana Beynəlxalq Maliyyə Mərkəzi arasında anlaşma memorandumu, ANKA pilotsuz uçuş aparatlarının birgə istehsalı üçün saziş də imzalanıb. TİKA və KazAID arasında inkişaf sahəsində əməkdaşlıq memorandumu, İstanbul Fond Birjası ilə Astana Beynəlxalq Birjası arasında anlaşma memorandumu da qəbul edilib.
