Oxu.Az xəbər verir ki, bunu WUF13-ün milli koordinatoru Anar Quliyev Ümumdünya Şəhərsalma Forumunun bağlanış mərasimində çıxışı zamanı deyib.
O bildirib ki, forum proqramı qlobal əhəmiyyət daşıyan şəhər problemlərinin müzakirəsinə həsr olunub.
Forum çərçivəsində dialoqlar, xüsusi sessiyalar, dəyirmi masalar, qiymətləndirmələr və paralel tədbirlər daxil olmaqla 400-dən çox tədbir təşkil edildi. Əsas sessiyalarda 125 ölkədən 400-dən çox məruzəçi iştirak etdi.
A.Quliyevin sözlərinə görə, WUF13-ün əsas üstünlüklərindən biri onun inklüziv xarakteri olub.
Milli koordinator qeyd edib ki, forum tarixində ilk dəfə QHT Forumu təşkil olunub. Bu platforma vətəndaş cəmiyyəti institutlarının, yerli icmaların və təşəbbüs qruplarının inklüziv, dayanıqlı və insan mərkəzli şəhər gələcəyinin qurulmasındakı rolunu ön plana çıxardı.
O bildirib ki, QHT Forumu çərçivəsində dayanıqlılıq və qlobal əməkdaşlığa dair Bakı Bəyannaməsi qəbul edilib.
A.Quliyev vurğulayıb ki, WUF13-də təqdim olunan əsas yeniliklərdən biri Biznes İnnovasiya Mərkəzinin yaradılması olub.
Onun sözlərinə görə, forum ümumilikdə 34 min kvadratmetrdən çox ərazini əhatə edib, sərgi sahəsi isə 10 min kvadratmetrdən artıq olub.
81 ölkədən 50-dən çox təşkilat 122 sərgi stendində təmsil olunurdu.
Milli koordinator qeyd edib ki, Azərbaycan pavilyonunda COP29, Bakı 2040 Baş Planı, Böyük Qayıdış proqramı, ağıllı şəhər və kəndlər, dayanıqlı şəhərsalma və digər istiqamətlər təqdim olunub.
A.Quliyev çıxışında xatırladıb ki, 2026-cı il Azərbaycanda Şəhərsalma və Memarlıq İli elan edilib.
O əlavə edib ki, işğaldan azad olunmuş Qarabağ və Şərqi Zəngəzurda həyata keçirilən yenidənqurma layihələri forum iştirakçılarının diqqət mərkəzində olub.
Milli koordinatorun sözlərinə görə, WUF13 çərçivəsində 70-dən çox tərəfdaş tədbiri təşkil olunub və müxtəlif formatlarda 150 mindən çox insan bu proseslərə cəlb edilib.
A.Quliyev bildirib ki, WUF13-ün mühüm nəticələrindən biri də Bakı Prinsiplərinin tətbiqinə dair Niyyət Məktubunun imzalanması olub.
