BMT-nin Məskunlaşma Proqramının (UN-Habitat) Şəhər üzrə Əsas Xidmətlər Bölməsinin rəhbəri Andre Dzikus Bakıda keçirilən Ümumdünya Şəhərsalma Forumunda (WUF13) çıxış edib.
O bildirib ki, şəhəri müəyyən edən onun xidmətləri və bu xidmətlərin təmin etdiyi həyat keyfiyyətidir. Bu, insanların etibar edə biləcəyi su, ödəyə biləcəyi enerji, istifadə edə biləcəyi nəqliyyat və ləyaqətlə yaşaya biləcəyi mühit ilə ölçülür.
Dzikus vurğulayıb ki, kommunal xidmət təminatçıları yalnız infrastruktur operatorları deyil, şəhərləri formalaşdıran əsas qüvvələrdir. Xidmətlərin olmadığı yerlərdə bərabərsizlik artır, güclü xidmətlərin mövcud olduğu şəhərlər isə daha uğurlu olur.
UN-Habitat rəsmisi qeyd edib ki, iqlim keçidi kommunal xidmət təminatçılarının iştirakı olmadan mümkün deyil. O, xidmət təminatçılarını şəhərlərin onurğa sütunu adlandırıb: "Siz təməlsiniz. Sizsiz nə adekvat mənzil təminatı, nə dayanıqlı şəhərlər, nə də davamlı gələcək mümkündür."
