Cənubi Koreya başda olmaqla, Asiyada "Elf qulağı" estetik proseduruna maraq sürətlə artır. Qulaqların daha qabarıq görünməsinə imkan verən dolğu və lent tətbiqləri üzü daha kiçik və mütənasib göstərdiyinə inanılır.
Bu barədə Oxu.Az "Hürriyet"ə istinadən xəbər verir. Trend Çin, Yaponiya və Cənubi Koreyada yayılıb. Ən uzunmüddətli təsirini Cənubi Koreyada göstərib.
Prosedur zamanı qulaq qığırdağının müəyyən bölgələrinə hialuron turşusu dolğusu inyeksiya edilir. Qulaqlar daha dik, daha qabarıq və üzün hər iki tərəfində daha nəzərəçarpan hala gəlir.
Cənubi Koreyanın Daequ şəhərində çalışan plastik cərrah bəzi günlərdə 20-yə qədər "Elf qulağı" inyeksiyası etdiyini bildirib. Prosedur sürətli həyata keçirilir və nəticələr qısa müddətdə nəzərə çarpır.
Trend böyüdükcə daha az müdaxilə tələb edən variantlar ortaya çıxıb. Dolğu inyeksiyaları ilə yanaşı, qulaqların arxasına yerləşdirilən xüsusi lentlər də populyarlaşıb. Bu lentlər qulaqları müvəqqəti olaraq önə doğru itələyir.
Mütəxəssislərə görə, "Elf qulaqları" trendini sadəcə qulaq problemi kimi görmək doğru olmaz. Əsl məqsəd üzü daha kiçik və balanslı göstərməkdir.
