Tehran Hörmüz boğazından tranzit keçid üçün deyil, yalnız gəmilərə göstərilən xidmətlərə görə ödəniş almağı planlaşdırır. Bu barədə İran xarici işlər nazirinin müavini Kazım Qəribabadi məlumat verib.
O, "Mehr" agentliyinə bildirib ki, İran tranzit rüsumu və ya vergi tətbiq etmək niyyətində deyil. Məqsəd Omanla birgə təqdim olunan naviqasiya dəstəyi, axtarış-xilasetmə, təhlükəsizlik və ekoloji təmizləmə xidmətlərinin qarşılığını almaqdır.
Qəribabadi qeyd edib ki, bu addımlar beynəlxalq dəniz hüququna uyğundur və BMT-nin Dəniz Hüququ Konvensiyası sahilyanı dövlətlərə xidmətlər qarşılığında ödəniş almağa icazə verir.
ABŞ ilə razılaşma prosesi davam edir. İran sənədi yalnız öz maraqları tam təmin olunduqda yekun hesab edəcək. Həmçinin Tehran razılaşmadan sonra xaricdəki dondurulmuş aktivlərin yarısının dərhal azad edilməsini tələb edir.
