FIFA Şurasının Bürosu Azərbaycana növbəti möhtəşəm turnirin ev sahibliyini həvalə edib. 15 yaşadək oğlan futbolçulardan ibarət komandalar arasında ilk dünya çempionatı və 2026-cı il Festivalı ölkəmizdə keçiriləcək.
Oxu.Az AFFA-ya istinadən xəbər verir ki, qərara əsasən, turnir 22-31 oktyabr tarixlərində təşkil olunacaq. Yarışda FIFA-ya üzv milli assosiasiyaların U-15 komandaları iştirak edə bilər.
FIFA bu qərarı qəbul edərkən Azərbaycanın müasir idman infrastrukturu, beynəlxalq standartlara cavab verən obyektləri və irimiqyaslı yarışların təşkilindəki uğurlu təcrübəsini nəzərə alıb. Bu, Azərbaycanın dünya futbolunda artan nüfuzunun göstəricisidir.
Qeyd edək ki, FIFA 2025-ci ilin dekabrında U-15 dünya çempionatının təsis edilməsi barədə qərar qəbul edib. Həmçinin, 2027-ci ildə U-20 dünya çempionatının final mərhələsi Azərbaycan və Özbəkistanın birgə ev sahibliyi ilə keçiriləcək.
