İran Futbol Federasiyası, DÇ-2026-nın qrup mərhələsinin üçüncü turunda Misirlə oyun öncəsi ABŞ-nin komandanın uçuşuna süni maneələr yaratdığını iddia edib.
Oxu.Az-a istinadən verilən məlumata görə, federasiyanın rəsmi saytında yayılan bəyanatda deyilir: "Bir neçə saat əvvəl İran millisinin futbolçuları Misirlə matça yollanmaq üçün hava limanına gəliblər. Lakin ev sahibi ABŞ tərəfindən Səid Elahi və Mehdi Taremiyə yenidən əngəllər törədilib, nəticədə komanda hava limanında ləngiməyə məcbur olub."
Qeyd edək ki, İran və Misir yığmaları arasındakı qarşılaşma iyunun 27-də Sietldəki "Lümen Fild" stadionunda keçiriləcək. Görüş Bakı vaxtı ilə saat 07:00-da başlayacaq. Artıq iyunun 24-də məlum olmuşdu ki, İran yığmasına ABŞ ərazisinə yalnız matçdan iki gün əvvəl daxil olmağa icazə veriləcək.
İran yığması dünya çempionatının qrup mərhələsinin ikinci turunda Belçika ilə 0:0, birinci turda isə Yeni Zelandiya ilə 2:2 hesabı ilə heç-heçə edib.
