Çin avtomobil istehsalçılarının Hindistan bazarına birbaşa girişi qadağan edilsə də, onlar elektromobil texnologiyaları ilə bu bazara yol tapır.
"Reuters" agentliyinin məlumatına görə, 2020-ci ildə sərhəd toqquşmasından sonra Hindistan Çin şirkətlərinə nəzarəti artırıb. Münasibətləri yaxşılaşdırmaq cəhdlərinə baxmayaraq, gərginlik davam edir.
Hüquq firması "Dentons Link Legal"ın tərəfdaşı Santosh Pay qeyd edir: "Hindistan öz istehsal sektorunu genişləndirmək istəyirsə, Çinlə tərəfdaşlıq qaçılmazdır. Çin şirkətləri isə qlobal lider olmaq üçün Hindistanı gözardı edə bilməz."
Hindistanın üçüncü ən böyük avtomobil istehsalçısı "Tata", Çin "Chery" platformasından istifadə edərək elektromobilləri bazara sürətlə çıxarır. Şirkət gələcəkdə Çin hissələrindən imtina edib yerli istehsala keçməyi planlaşdırır.
Yüksək rütbəli bir hindistanlı rəsmi bildirib ki, hökumət yerli istehsalı artıran müqavilələri dəstəkləyir. Çin avtomobil şirkətləri üçün bu cür razılaşmalar, ixrac məhdudiyyətlərini pozmadan gəlirləri artırmaq üçün optimal həll yoludur.
Çin istehsalçıları Hindistan bazarını mənimsəməyə davam edəcək. Bu, Hindistana yatırım edən Yaponiya şirkətləri üçün pis xəbərdir, çünki onlar hazırda Çin rəqabəti ilə üzləşmirlər.
