AFFA Misli Premyer Liqasında çıxış edən klublara ciddi intizam cəzaları tətbiq edib.
Oxu.Az xəbər verir ki, bu barədə qurumun İntizam Komitəsinin iclasında qərar qəbul olunub.
Mayın 22-də XXXIII tur çərçivəsində keçirilən "Sumqayıt" - "Qarabağ" oyunundan sonra kənar şəxslərin meydançaya daxil olması səbəbindən "Sumqayıt" 2 500 manat cərimələnib.
Eyni matçda "Qarabağ" azarkeşlərinin pirotexniki vasitələrdən istifadə etməsi Ağdam klubuna 8 min manat cərimə qazandırıb.
Mayın 23-də keçirilən "Kəpəz" - "Neftçi" oyununda Gəncə klubunun 4 oyunçusu sarı vərəqə alaraq 700 manat cəriməyə səbəb olub. Matçın 65-ci dəqiqəsində birbaşa qırmızı vərəqə alan "Neftçi"nin futbolçusu İfenayi Metyu 1-i şərti olmaqla 2 oyunluq diskvalifikasiya edilib. Paytaxt klubu 1000 manat cərimə ödəyəcək, futbolçu üçün 6 aylıq sınaq müddəti tətbiq ediləcək.
