Astana qazax dilində "paytaxt" deməkdir. 29 il əvvəl Qazaxıstanın paytaxtı statusunu alandan sonra şəhər "Avrasiyaya qızıl qapı" ləqəbini qazanıb. Keçmiş ticarət yollarının kəsişməsində yerləşən kiçik yaşayış məntəqəsi sürətlə böyüyən şəhərə - xarici investisiyalar üçün əsas regional cəlbedici mərkəzlərdən birinə çevrilib. Dünyanın ən soyuq şəhərləri arasında ikinci yerdə olan paytaxt indi mühüm siyasi, iqtisadi və idman tədbirlərinin mərkəzi kimi tanınır.
Özünə iddialı və xəyallar şəhəri. Hava limanından hotelə qədər geniş küçələri, memarlığı ilə diqqət çəkən ən müasir binaları heyranlıqla izlədim. Sürücünün "Astana bu gün gələcəyin şəhəri, xəyallar şəhəridir. Hər gün inkişaf edir və çiçəklənir" fikirlərinə haqq qazandırdım. Ən heyrətamiz formalı göydələnlər, müasir parklar, gözəl fəvvarələr və abidələr paytaxtın küçələrini bəzəyir.
Astana inkişafını Qazaxıstanın keçmiş dövlət başçısı Nursultan Nazarbayevə borcludur. Şəhər qarşısına dünyanın ən gözəl paytaxtlarından birinə çevrilmək kimi iddialı, lakin əldə edilə bilən bir məqsəd qoyub.
Paytaxtda qonaqları Qazaxıstanın tarixinə bələd olmaq üçün simvol yerlərlə tanış edirlər. Həzrət Sultan məscidi, Nazarbayev Universiteti, Bayterik qülləsi, Akorda Sarayı, Xan Çadırı, "Qazax eli" abidəsi kimi görməli yerlər şəhər haqqında təəssüratları zənginləşdirir.
Milli Muzey təkcə eksponatlar toplusu deyil, həm də Qazaxıstan tarixini öyrənmək və xalqının ruhunu yaşamaq üçün mədəniyyət, elm və ilham mərkəzidir. Kolleksiyada 200 mindən çox eksponat var. İl ərzində 10 mindən çox insan ziyarət edir.
Muzeyin 16 zalında Böyük Çöl sivilizasiyasını formalaşdıran tarixi şəxsiyyətlərin, mütəfəkkirlərin və hökmdarların irsi nümayiş etdirilir. Qızıl zallarda qədim köçərilərin unikal tapıntıları, o cümlədən İssık kurqanından tapılan "Qızıl Adam" sərgilənir.
Astana köçəri mədəniyyəti ilə gələcəyin memarlıq üslubunu bir araya gətirir. 2026-cı il Qazaxıstanda "Rəqəmsallaşdırma və Süni İntellekt İli" elan edilib. "Gələcəyin Mərkəzi: alem.ai" Süni İntellekt Muzeyi texnologiya və süni intellekt təcrübə mərkəzi kimi fəaliyyət göstərir.
Muzeydə süni intellektlə söhbət etmək mümkündür. Virtual bələdçi Ayla sualları cavablandırır və ziyarətçiləri istiqamətləndirir. Əsas sərgi süni intellektin gələcəyinə və cəmiyyətə təsirinə həsr olunub. Ziyarətçilər "Apple II" və IBM kimi əfsanəvi kompüterləri görə bilərlər.
Yuxarı mərtəbələrdə "TUMO Astana" yaradıcı texnologiya mərkəzi yeniyetmələrə proqramlaşdırma və robototexnika öyrədir. Dərslər tamamilə pulsuzdur. Mərkəz "gələcəyin şəhəri" platformasını təqdim edir.
