Azərbaycanda çay sadəcə qonaqpərvərlik rəmzi deyil, həm də gündəlik həyatın ayrılmaz hissəsidir.
Oxu.Az xəbər verir ki, bu barədə "Euronews" telekanalının məqaləsində qeyd olunub. Yerli sakinlər bütün mühüm həyat hadisələrini çayla əlaqələndirirlər.
Çay söhbətdən əvvəl gəlir, işgüzar danışıqların tonunu müəyyənləşdirir, kədəri yumşaldır. Süfrəyə çaysız əyləşmək qeyri-adi haldır. Çay "armudu" stəkanlarda süzülür.
Stəkanın incə "beli" istiliyi saxlayır: qaynar hissə aşağıda, yuxarı hissə soyuq qalır. Bu forma rahat içməyə imkan verir.
Çay süfrəsinin vacib hissəsi mürəbbələrdir. Kiçik nəlbəkilərdə təqdim olunur. Çiyələk, armud, ərik və qoz mürəbbələri öz formasını qoruyur.
Azərbaycanda mürəbbə çaya qatılmır, çörəyə çəkilmir. Əvvəlcə mürəbbə dadılır, sonra çay içilir.
