Beynəlxalq Atom Enerjisi Agentliyinin (BAEA) Rəhbərlər Şurası İranı agentliklə tam əməkdaşlığa çağıran qətnamə qəbul edib. Sənəd yüksək dərəcədə zənginləşdirilmiş uran ehtiyatları ilə bağlı məlumatların təqdim edilməsini tələb edir.
Oxu.Az xəbər verir ki, qətnamə layihəsi Fransa, Böyük Britaniya, Almaniya və ABŞ tərəfindən təqdim olunub. Lehinə 21 ölkə səs verib, 10 ölkə bitərəf qalıb. Rusiya, Çin və Niger əleyhinə çıxış edib.
Sənəddə İranın silah yaratmağa imkan verən səviyyəyə yaxın nüvə materialları haqqında BAEA-ya tam məlumat verməli olduğu vurğulanır. Həmçinin agentlik müfəttişlərinin nüvə obyektlərinə girişi təmin edilməlidir.
İranın Vyanadakı BMT yanında daimi nümayəndəliyi qətnaməni tənqid edərək onu “siyasi” adlandırıb. Tehran özünün “alınmaz hüquqları”nı müdafiə edəcəyini bildirib.
