ABŞ-nin Texas ştatında yerləşən SpaceX şirkətinin bazasında iş yerində baş vermiş bədbəxt hadisə nəticəsində bir nəfər həyatını itirib.
Oxu.Az xəbər verir ki, bu barədə yerli rəsmilərə istinadən The Wall Street Journal qəzeti məlumat yayıb.
Nəşrin məlumatına əsasən, hadisə cümə günü qeydə alınıb. Starbase kompleksinin inkişaf etdirilməsi üzərində işləyən SpaceX podratçılarından birinin əməkdaşı yıxıldıqdan sonra vəfat edib.
Qeyd olunur ki, son illər ərzində SpaceX Starship kosmik gəmisinin prototipinin buraxılışlarını daha tez-tez icra etməyə imkan verəcək infrastrukturun qurulması da daxil olmaqla, bazanın təkmilləşdirilməsi prosesini sürətləndirib. Starship-in növbəti sınaq uçuşu mayın 20-nə təyin edilib. İstehsalçı şirkətin planlarına görə, universal olacaq Starship kosmik sisteminin digər versiyalardan fərqi Yer orbitinə insanlı uçuşlar, peyklərin kosmosa çıxarılması, Ay və Mars missiyaları, eləcə də daha uzaq səma cisimlərinə səyahətlər üçün istifadə olunmasının mümkünlüyüdür.
