ABŞ və İranın İsveçrədə qarşılıqlı anlaşma memorandumu imzalamaq planları hələ tam razılaşdırılmayıb.
Oxu.Az xəbər verir ki, bu barədə ABŞ vitse-prezidenti Cey Di Vensin rəsmi nümayəndəsi jurnalistlərə məlumat verib.
"Vitse-prezidentin mətbuat konfransında bildirdiyi kimi, texniki məsələlərlə bağlı danışıqların planları hələ təsdiqlənməyib. ABŞ nümayəndə heyəti ilk fürsətdə yola düşməyə hazırdır", - deyə nümayəndə qeyd edib.
Açıqlamada vurğulanıb ki, vitse-prezidentin iyunun 18-də İsveçrəyə yola düşməsi planlaşdırılmır. Vaşinqton bu müzakirələrə ən qısa zamanda başlamaq niyyətindədir.
"Axios" və İsrailin "Channel 12" əməkdaşı Barak Ravid "X" platformasında bildirib ki, səfərin təxirə salınması Tehranın Livanla bağlı mövqeyi ilə bağlı ola bilər.
Tehran əvvəlcədən xəbərdarlıq edib ki, İsrailin Livana hücumu memorandumun şərtlərinin pozulması kimi qəbul ediləcək.
Cey Di Vens daha əvvəl memorandumun imza mərasiminin həftəsonu keçiriləcəyini açıqlamışdı.
