Cənub okeanında yerləşən Avstraliyaya məxsus Herd və Makdonald adalarında H5N1 quş qripi epidemiyası 13 mindən çox cənub dəniz fili balasını məhv edib.
Avstraliya Antarktika Divizionunun hesabatına görə, Herd adasında dəniz fillərinin gənc nəslinin ümumi sayı təxminən 17 min fərd təşkil edib, onlardan 13 minə yaxını virus səbəbindən tələf olub. Orta ölüm göstəricisi 76%, bəzi koloniyalarda isə 97%-ə çatıb.
2026-cı ilin yanvar ayına qədər bütün tədqiq edilən çoxalma ərazilərində, o cümlədən Makdonald adasında dəniz fili balalarının kütləvi ölümü qeydə alınıb.
Tədqiqatın aparıcı müəllifi, bioloq doktor Culi MakKinnes qeyd edib ki, Herd və Makdonald adalarında H5 qripinin müşahidə olunması virusun Avstraliyadan kənar ərazilərə keçidinin ilk halıdır.
Tədqiqatçılar kral və papua pinqvinləri arasında da yüksək ölüm hallarını qeydə alıblar. Doqquz növdən götürülmüş nümunələrin analizi altı növdə H5N1 virusunu təsdiqləyib: cənub dəniz filləri, kral pinqvinləri, papua pinqvinləri, antarktika dəniz pişikləri və fırtına quşları.
Genetik analizlər virusun adalara, böyük ehtimalla, Herd adasından təxminən 1.8 min km aralıda yerləşən Fransanın Kroze arxipelaqından vəhşi heyvanlar vasitəsilə keçdiyini göstərib. Ehtimal olunur ki, bu proses 2025-ci ilin avqustunda baş verib.
Epidemiyanın miqyasını qiymətləndirmək üçün alimlər 120 pilotsuz uçuş aparatı ilə monitorinq aparıb və sahil boyu təxminən 300 km məsafədə yerüstü yoxlamalar keçiriblər.
Herd və Makdonald adaları UNESCO-nun Ümumdünya İrsi siyahısına daxildir və Cənub okeanında dəniz məməlilərinin və quşlarının çoxalması üçün ən mühüm məkanlardan biri hesab olunur.
