Harvard Universitetinin təxminən 57 milyard dollarlıq vəqf fondunun rəhbəri N.P. Narvekar, idarə heyətinə təqaüdə çıxmaq niyyətini bildirib. Bu barədə Wall Street Journal mənbələrə istinadən məlumat yayıb.
Narvekar dəqiq ayrılma tarixi müəyyən etməsə də, 2027-ci ilin sonunda istefa vermə ehtimalını müzakirə edib. Harvard İdarəetmə Şirkəti (Harvard Management Co) hələlik rəsmi açıqlama verməyib.
Narvekar 2016-cı ilin dekabrından Harvardın investisiya qoluna rəhbərlik edir. Ondan əvvəl Kolumbiya Universitetinin İnvestisiya İdarəetmə Şirkətinin CEO-su olub.
Harvardın vəqf fondu universitetlər arasında dünyanın ən böyük fondudur. 2025-ci maliyyə ilində güclü investisiya gəlirləri sayəsində təxminən 4 milyard dollar artaraq 56,9 milyard dollara çatıb.
