Panama Milli Assambleyası ölkədə qeydiyyatdan keçmiş çoxmillətli şirkətlərin yerli fəaliyyət göstərməsini tələb edən qanunu təsdiqləyib. Bu tələblərə əməl edilmədikdə, şirkətlər passiv xarici gəlirlərinə 15% vergi ödəməli olacaqlar.
Qanun Aİ-nin vergi şəffaflığı tələblərini təmin etmək və Panamanın nəzarət siyahılarından çıxarılmasına kömək məqsədi daşıyır.
Maliyyə Nazirliyi bildirib ki, qanun çoxmillətli şirkətlərin vergi üstünlüyü əldə etmək üçün deyil, real fiziki əməliyyatlar və faktiki fəaliyyət göstərməsini tələb edir.
Əgər şirkət ixtisaslı kadrlar, adekvat obyektlər, strateji qərarlar və real əməliyyat xərcləri ilə iqtisadi mahiyyətini sübut edə bilməzsə, onun passiv xarici gəlirlərinə 15% vergi tətbiq olunacaq.
Vergiyə cəlb olunan passiv gəlirlərə dividendlər, faizlər, royaltilər, kapital qazancı və daşınmaz əmlak gəlirləri daxildir.
Prezident Xose Raul Mulino tərəfindən imzalanmalı olan qanun 2027-ci il maliyyə ilindən qüvvəyə minəcək və icra hakimiyyətinə 90 gün müddətində tənzimləyici sənədlər hazırlamaq tapşırılacaq.
Panamada hazırlanmış qeyri-maddi aktivlərdən (patentlər, ticarət nişanları, müəllif hüquqları) əldə edilən gəlirlərə xüsusi rejim tətbiq edilir. Ticarət donanması və maliyyə sektoru bu qanundan kənarlaşdırılıb.
