İran rəhbərliyi ABŞ ilə razılığa gəlmək üçün dördmərhələli plan hazırlayıb.
Oxu.Az bildirir ki, bu barədə "Fars" agentliyi Tehranın danışıqlar nümayəndə heyətinin üzvü Səid Acarluya istinadən məlumat yayıb.
Agentliyin həmsöhbətinin sözlərinə görə, plan hələlik Vaşinqtona göndərilməyib.
Planın birinci bəndi hərbi əməliyyatların tamamilə dayandırılmasını nəzərdə tutur. "Bu məsələ bütün tərəfləri və bütün cəbhələri əhatə etməlidir: həm İran və ABŞ-ni, həm də müqavimət cəbhəsini", - deyə Acarlu bildirib.
İkinci mərhələdə İran dörd məsələnin həllini təklif edir: Hörmüz boğazında gəmiçilik, İran limanlarından blokadanın götürülməsi, neft sanksiyalarının ləğvi və dondurulmuş aktivlərin bir hissəsinin sərbəst buraxılması.
Üçüncü mərhələdə sanksiyalar və nüvə proqramı müzakirə olunacaq. Son mərhələdə isə hər iki tərəfin öhdəliklərini yerinə yetirməsinə nəzarət edəcək komitə yaradılacaq.
"Komitənin üzvləri hələ təsdiqlənməyib, lakin İran dost və müttəfiq ölkələrin iştirakını istəyir ki, sazişin icrası dəstəklənsin", - deyə Acarlu qeyd edib.
