Azərbaycan Həmkarlar İttifaqları Konfederasiyası (AHİK) 18 İyun - İnsan Hüquqları Günü münasibətilə "İnsan hüquqlarının müdafiəsində həmkarlar ittifaqlarının rolu" mövzusunda tədbir keçirib.
Tədbirdə dövlət qurumları, ictimai təşkilatlar, hüquqşünaslar, vəkillər, mediatorlar, AHİK və üzv təşkilatlarının əməkdaşları iştirak ediblər.
AHİK sədr müavini Musa Mirzəyev qeyd edib ki, Azərbaycanda insan hüquqlarının təmin edilməsi dövlətin ali məqsədidir. Prezident İlham Əliyevin rəhbərliyi ilə hüquqi dövlət quruculuğu və insan hüquqlarının müdafiəsi istiqamətində ardıcıl siyasət həyata keçirilir.
Birinci vitse-prezident Mehriban Əliyevanın təşəbbüsləri ilə həyata keçirilən humanitar və sosial layihələrin insan hüquqlarının qorunmasında əhəmiyyəti vurğulanıb.
Həmkarlar ittifaqları layiqli əmək və insan hüquqlarının təminində mühüm rol oynayır. AHİK işçilərin əmək və sosial-iqtisadi hüquqlarının müdafiəsi, hüquqi yardım, kollektiv müqavilələrin təşviqi, təhlükəsiz əmək şəraitinin təmin edilməsi və hüquqi maarifləndirmə sahələrində sistemli fəaliyyət göstərir.
Tədbirdə həmçinin insan hüquqlarının müdafiəsində mövcud hüquqi çağırışlar və əmək münasibətlərinin aktual məsələləri müzakirə olunub. İştirakçılar dövlət qurumları, vətəndaş cəmiyyəti və sosial tərəfdaşlar arasında əməkdaşlığın gücləndirilməsinin vacibliyini vurğulayıblar.
