Azərbaycan Həmkarlar İttifaqları Konfederasiyasında (AHİK) "İş yerlərində gender bərabərliyinin təşviqi" mövzusunda tədbir keçirilib.
Tədbirdə mərkəzi icra hakimiyyəti orqanlarının nümayəndələri, AHİK və Beynəlxalq Əmək Təşkilatının (BƏT) İşçilərin fəaliyyəti üzrə bürosunun (ACTRAV) təmsilçiləri iştirak ediblər.
AHİK sədrinin müavini Musa Mirzəyev çıxışında Prezident İlham Əliyevin rəhbərliyi ilə demokratik inkişafı, insan hüquq və azadlıqlarının yüksək səviyyədə təmin olunmasını vurğulayıb. O, gender bərabərliyinin təşviqi və qadınların rolunun gücləndirilməsi istiqamətində görülən işləri diqqətə çatdırıb, Birinci vitse-prezident Mehriban Əliyevanın xüsusi xidmətlərini qeyd edib.
Bildirilib ki, Konfederasiya gender məsələlərinə xüsusi həssaslıqla yanaşır, əmək kollektivlərində bərabər imkanlar yaradılması və qadınların əmək bazarında fəal iştirakının dəstəklənməsi üçün vacib addımlar atır.
Ailə, Qadın və Uşaq Problemləri üzrə Dövlət Komitəsinin Aparat rəhbəri Ceyran Rəhmətullayeva, Dövlət Əmək Müfəttişliyi Xidmətinin rəis müavini Nərmin Mirzəyeva və digər çıxışçılar gender siyasətindən bəhs ediblər.
Tədbirə onlayn qoşulan BƏT-in gender mütəxəssisi Özge Berber Ağtaş gender bərabərliyinin inklüziv əmək münasibətlərində əhəmiyyətini vurğulayıb.
Sonda "Gender bərabərliyi: ailə, əmək bazarı və milli inkişaf" mövzusunda təqdimat edilib.
