İnnovasiya və Rəqəmsal İnkişaf Agentliyi (İRİA) və "Plug and Play" innovasiya şirkətinin tərəfdaşlığı ilə keçirilən "GOAL" proqramının qalib startapları Silikon Vadisində görüşlər keçirib.
Azərbaycan startapları ilə "Plug and Play" şirkətinin baş icraçı direktoru Saed Amiri arasında görüş baş tutub. Görüşdə startapların inkişafı, investisiya, xarici bazarlara çıxış və "Silikon Vadisi" ekosisteminə inteqrasiya imkanları müzakirə edilib.
Proqram iştirakçıları həmçinin "Plug and Play"in müxtəlif komandaları ilə görüşlər keçirirlər. Növbəti həftə startaplar "Silicon Valley Summit" çərçivəsində "Global Startup Showcase" səhnəsində çıxış edəcək, məhsullarını beynəlxalq auditoriyaya təqdim edəcəklər.
Proqram ərzində "Hyundai Innovation Day", "LinkedIn", "Odoo" və "San Jose AI Center of Excellence Expo" kimi tədbirlər də nəzərdə tutulub. Azərbaycandan olan "Pionero AI" startapı "Shark Tank" sessiyasının qalibi olaraq "Global Startup Showcase" tədbirində investorlar önündə təqdimat imkanı əldə edib.
"GOAL" proqramında altı Azərbaycan startapı iştirak haqqı qazanıb: "Glacies Biome", "Enduropy", "Bonfi", "Recepta", "Pixelfork", "Pionero AI". Startaplar investor sessiyalarında, korporativ müzakirələrdə, təqdimat simulyasiyalarında və beynəlxalq şəbəkələşmə tədbirlərində iştirak edirlər.
"GOAL" proqramının məqsədi yerli innovasiya ekosisteminin beynəlxalq səviyyədə tanınmasına, Azərbaycan startaplarının qlobal platformalarda təmsil olunmasına və ölkənin innovasiya potensialının təşviqinə dəstək verməkdir.
