"AzInTelecom" MMC Keniyada keçirilən, Afrikanın ən böyük texnologiya və süni intellekt sərgilərindən biri "AI GITEX Kenya 2026"da iştirak edib.
İnnovasiya və süni intellekt sahəsində fəaliyyət göstərən şirkətlər və ekspertləri bir araya gətirən tədbirdə "AzInTelecom" stendlə təmsil olunub.
Şirkətin sərgidə iştirakının başlıca hədəfi qlobal texnologiya arenasında mövqeyini gücləndirmək, xarici tərəfdaşlarla strateji əməkdaşlıq əlaqələrini inkişaf etdirmək və rəqəmsal məhsullarını beynəlxalq miqyasda nümayiş etdirmək olub.
Tədbirdə şirkətin Kommersiya departamentinin direktoru Fərrux Fərəcullayev çıxış edərək böyük həcmli dataların idarəolunmasında süni intellektin rolundan danışıb. O, bu sahədə yaranan nəhəng məlumat axınının təhlükəsiz şəkildə emal edilməsi üçün "AzInTelecom"un təklif etdiyi rəqəmsal infrastruktur imkanlarını diqqətə çatdırıb.
Sərgi iştirakçıları tərəfindən şirkətin rəqəmsal məhsul və xidmətlərinə maraq göstərilib, təqdim olunan innovativ həllər barədə ziyarətçilərə məlumat verilib.
"AzInTelecom" haqqında
"AZCON Holding" şirkətlərindən olan "AzInTelecom" MMC bulud həlləri, rəqəmsal identifikasiya və kibertəhlükəsizlik sahəsində ixtisaslaşmış texnologiya şirkətidir. 2015-ci ildən fəaliyyət göstərən şirkət "Hökumət buludu" və SİMA rəqəmsal imza kimi ölkəmiqyaslı layihələrin provayderidir. "AzInTelecom" MMC müştərilərə daim təhlükəsiz, dayanıqlı və əlçatan xidmətlər təklif etməklə ölkədə rəqəmsal transformasiyanın sürətləndirilməsinə və innovativ texnologiyaların tətbiqinə töhfə verir.
