Bakıda Azərbaycan Həmkarlar İttifaqları Konfederasiyası (AHİK), Türkmənistan Milli Həmkarlar İttifaqları Mərkəzi (TMHİM) və Beynəlxalq Əmək Təşkilatı (BƏT) İşçilərin Fəaliyyəti Bürosu (BƏT-ACTRAV) birgə "İqlim dəyişikliyi üzrə həmkarlar ittifaqlarının fəaliyyəti" konfransı təşkil edib.
Tədbirdə dövlət rəsmiləri, millət vəkilləri, QHT və ictimai təşkilat təmsilçiləri, eləcə də Azərbaycan və Türkmənistan həmkarlar ittifaqları, BƏT, İslam Əməkdaşlıq Təşkilatı (İƏT) Əmək Mərkəzindən nümayəndələr iştirak edib.
Konfrans Dövlət Himninin səsləndirilməsi və şəhidlərin xatirəsinin bir dəqiqəlik sükutla anılması ilə başlayıb.
Prezidentin iqlim məsələləri üzrə nümayəndəsi Muxtar Babayev çıxış edərək qlobal iqlim dəyişmələri, Azərbaycanın iqlim siyasəti, "yaşıl keçid" və ətraf mühitin qorunması tədbirlərindən danışıb. Qeyd olunub ki, ölkədə ekologiyanın yaxşılaşdırılması, yaşıllıqların artırılması, su və bərpa olunan enerji mənbələrindən səmərəli istifadə istiqamətində işlər aparılır. "Yaşıl keçid" prosesində işçilərin yeni bacarıqlarının formalaşdırılması və məşğulluq imkanlarının artırılması önəm daşıyır. Həmkarlar ittifaqlarının fəal iştirakı inklüziv, ədalətli və şəffaf yanaşmaların təminatı üçün vacibdir.
Konfederasiya sədri Sahib Məmmədov bildirib ki, Azərbaycan Prezident İlham Əliyevin rəhbərliyi ilə qlobal iqlim fəaliyyətinə töhfə verən ölkələrdəndir. İqlim dəyişmələri sosial və əmək münasibətlərinə təsir edən qlobal çağırışdır. Əmək bazarındakı dəyişikliklər həmkarlar ittifaqlarından çeviklik tələb edir. "Ədalətli keçid" prinsiplərinin təminatı, işçilərin müdafiəsi və sosial dialoqun gücləndirilməsi prioritetdir. AHİK beynəlxalq tərəfdaşlarla əməkdaşlığı davam etdirir.
Türkmənistan Milli Həmkarlar İttifaqları Mərkəzinin sədri Oğulcənnət Berdiliyeva belə platformaların təcrübə mübadiləsi üçün əhəmiyyətini vurğulayıb. Həmkarlar ittifaqları əmək bazarı dəyişikliklərinə operativ uyğunlaşmalı və işçilərin sosial müdafiəsini gücləndirməlidir.
Əmək və əhalinin sosial müdafiəsi nazir müavini Zaur Əliyev dövlət siyasətində iqlim dəyişmələrinin sosial nəticələrinə önəm verildiyini bildirib. O, əmək bazarının dayanıqlığının gücləndirilməsi işçi qüvvəsinin gələcək trendlərə hazırlanmasını vacib sayır.
Milli Məclisin Əmək komitəsinin sədri Musa Quliyev iqlim dəyişmələrinin sosial nəticələrinin qanunvericilik baxımından önəmini qeyd edib. "Yaşıl iqtisadiyyat"a keçid sosial tərəfdaşlıq mexanizmlərinin gücləndirilməsini tələb edir.
İƏT-in Əmək Mərkəzinin baş direktoru Azər Bayramov iqlim çağırışlarının yeni yanaşmalar tələb etdiyini qeyd edib. İƏT çərçivəsində əmək və sosial müdafiə sahələrində birgə təşəbbüslər genişləndirilməlidir.
İqtisadiyyat nazirinin müşaviri Hüseyn Hüseynov Azərbaycanın rəqabətqabiliyyətli iqtisadi siyasətindən danışıb. Yaşıl iqtisadi yanaşmalar investisiya mühitini yaxşılaşdırır və iqtisadiyyatı daha dayanıqlı edir.
BƏT-ACTRAV-ın Avropa və Mərkəzi Asiya üzrə rəhbəri Serqius Qlovaskas onlayn qoşulub. O, BƏT-in "ədalətli keçid" yanaşmasını təşviq etdiyini və həmkarlar ittifaqlarının fəal iştirakını dəstəklədiyini bildirib.
BƏT-in baş mütəxəssisi Qoça Aleksandria "Ədalətli keçiddə həmkarlar ittifaqlarının rolu" mövzusunda təqdimat edib.
Sonra "İqlim dəyişikliyi və əmək dünyası" panel müzakirəsi keçirilib. Tədbir çərçivəsində AHİK-in islahatları əks etdirən videoçarx nümayiş etdirilib.
