"Həmkardan həmkara qayğı ilə" sosial layihəsi çərçivəsində növbəti səyyar tibbi aksiya Daşkəsən rayonunda keçirildi.
Azərbaycan Həmkarlar İttifaqları Konfederasiyası (AHİK) tərəfindən təşkil edilən, Səhiyyə Nazirliyi və TƏBİB-in dəstəyi ilə reallaşan layihə çərçivəsində sakinlərə pulsuz tibbi xidmətlər göstərildi.
Daşkəsən Rayon Mərkəzi Xəstəxanasında keçirilən müayinələrdə kardiologiya, endokrinologiya, uşaq nevrologiyası, nevrologiya, dermatologiya və urologiya sahələri üzrə həkimlər iştirak etdi.
İki gün ərzində 300-dən çox rayon sakini müayinə olundu. Müayinə nəticəsində səhhətində problem aşkarlanan şəxslərə müvafiq tövsiyələr verildi və müalicə yolları göstərildi.
Aksiyada AHİK könüllüləri də fəal rol oynadı.
Layihə ucqar bölgələrdə yaşayanların tibbi xidmətlərə çıxışını artırmaq, sağlamlıqlarını qorumaq və dövlətin sosial siyasətinə töhfə vermək məqsədi daşıyır.
2025-ci ilin aprelindən başlayan layihə çərçivəsində ümumən 3 minə yaxın vətəndaş pulsuz müayinədən keçib.
