Prezident İlham Əliyevin rəqəmsal inkişaf Fəaliyyət Planı çərçivəsində Ədliyyə Nazirliyi məqsədyönlü tədbirlər həyata keçirir.
Rəqəmsal dövlət xidmətlərinin "bir pəncərə" prinsipi ilə vahid platformaya inteqrasiyası davam edir. Bu çərçivədə Ədliyyə Nazirliyinin bir sıra xidmətləri artıq "mygov" platformasına qoşulub.
Vətəndaşlar artıq ayrı-ayrı platformalara keçid etmədən birbaşa "mygov" üzərindən bu xidmətlərdən yararlana bilərlər. Bu, istifadəçi təcrübəsini sadələşdirir və xidmətlərə çıxışı asanlaşdırır.
İnteqrasiya olunan xidmətlər:
- Tərcümə xidməti
- Azyaşlının ölkəni tərk etməsi üçün razılıq ərizəsi
- Fiziki şəxslərə aid icra işləri barədə məlumatlar
Tərcümə xidməti ilə vətəndaşlar notariat qaydasında təsdiqi mümkün olan və olmayan sənədlərin tərcüməsi üçün rəqəmsal müraciət edə bilərlər. Sənəd və dil məlumatlarını daxil edib, ödənişdən sonra müraciət göndərilir. Statusu "mygov" üzərindən izlənilir.
Azyaşlının ölkəni tərk etməsi üçün razılıq ərizəsində vətəndaş azyaşlı, müşayiətçi və səfər məlumatlarını daxil edir, video identifikasiya və ödənişdən sonra müraciət göndərilir. Nəticə barədə bildiriş gəlir.
Fiziki şəxslərə aid icra işləri xidməti ilə istifadəçilər öz icra işləri və sənədlərlə platformada tanış ola, sənədləri PDF yükləyə bilərlər.
Əvvəllər də Ədliyyə Nazirliyinin həyat hadisələri əsaslı beş xidməti və notariat fəaliyyəti ilə bağlı dörd xidməti "mygov"-a inteqrasiya edilmişdi. Vətəndaşlar bu xidmətlərdən my.gov.az portalı və "mygov" mobil tətbiqi ilə istifadə edə bilərlər.
