"Xəzri TN" MMC-nin tərkibində fəaliyyət göstərən №1 Çörək Zavodunda istehsal prosesi texnoloji və sanitariya normalarına uyğun şəkildə həyata keçirilir.
Bu barədə "Baku TV" tərəfindən hazırlanmış süjetdə qeyd olunub. Çəkiliş zamanı məhsulların istehsaldan qablaşdırmaya qədər keçdiyi mərhələlər izlənilib.
"Xəzri TN" MMC-nin Keyfiyyətə Nəzarət Şöbəsinin rəhbəri Rəşad Mehdiyev bildirib ki, sosial şəbəkələrdə yayılan kiflənmiş şirniyyat iddiaları ilə bağlı daxili araşdırma aparılıb: "Araşdırma nəticəsində hər hansı uyğunsuzluq aşkar olunmayıb. Bu, müəssisəyə qarşı qərəzli yanaşma və qarayaxma cəhdidir."
R.Mehdiyev əlavə edib ki, zavod 2013-cü ildən beynəlxalq standartlara uyğun fəaliyyət göstərir: "İstehsal prosesi ən son Almaniya texnologiyaları əsasında, insan təması minimuma endirilməklə həyata keçirilir. Müəssisə 2024-cü ildən ISO 9001 və ISO 22000 sertifikatlarına malikdir."
Qida məhsullarının keyfiyyətində daşınma və saxlanma şəraiti də mühüm əhəmiyyət daşıyır. Vətəndaşlar sosial şəbəkələrdə yayılan məlumatları yoxlamalı, rəsmi açıqlamalara etibar etməlidirlər.
