"AzInTelecom" MMC Bakıda keçirilən Beynəlxalq Maliyyə və Bankçılıq Sammitində iştirak edib.
Türk dövlətlərinin qlobal maliyyə inteqrasiyası mövzusunda keçirilən sammitdə "AzInTelecom"un stendi qurulub. Stenddə SİMA rəqəmsal həllər platformasının maliyyə sektoru üçün faydalı məhsulları barədə məlumat verilib.
Şirkətin Kommersiya departamentinin direktoru Fərrux Fərəcullayev "Biometriyanın fintekdə müasir rəqəmsal həllərə təsiri" mövzusunda çıxış edib. O, üztanıma və digər biometrik identifikasiya həllərinin maliyyə institutlarında fırıldaqçılıqla mübarizədə kritik rol oynadığını qeyd edib.
Müzakirələrdə kibertəhlükəsizlik, yaşıl maliyyə, investisiya imkanları və insan kapitalının inkişafı kimi mövzulara toxunulub. "AzInTelecom" regionda fintek ekosisteminin inkişafına töhfə vermək məqsədi ilə tədbirdə iştirak edib.
"AzInTelecom" 2015-ci ildən bulud həlləri, rəqəmsal identifikasiya və kibertəhlükəsizlik sahəsində fəaliyyət göstərir. Şirkət "Hökumət buludu" və SİMA platformasının provayderidir.
