22 may 2026-cı il tarixdə Xətai rayonu, Heydər Əliyev adına istirahət parkının amfiteatr səhnəsində III Kəlağayı Festivalı təşkil olunub. Tədbir Şəhərsalma və Memarlıq ili çərçivəsində Bakı şəhər Mədəniyyət Baş İdarəsi, Xətai rayon İcra Hakimiyyəti və Qərbi Azərbaycan İcmasının birgə təşkilatçılığı ilə baş tutub.
Festivalda Xətai Rayon İcra Hakimiyyətinin başçısı Rafiq Quluyev, YAP Xətai rayon təşkilatının sədri Ramil Mirzəyev, Milli Məclisin deputatları, Qərbi Azərbaycan İcmasının sədri, ictimaiyyət nümayəndələri, tanınmış müğənnilər, aşıqlar, şairlər, şəhid anaları və rayon sakinləri iştirak ediblər.
Çıxış edənlər kəlağayının milli-mənəvi dəyər olduğunu vurğulayıb, onun gənc nəsillərə tanıdılmasının əhəmiyyətini qeyd ediblər. Sərgidə "Kəlağayı ev-muzeyi"nin 200 qədim kəlağayısı, dekorativ-tətbiqi sənət nümunələri və kitablar nümayiş olunub. Şəki və Basqal ustalarının kəlağayıları da satışa çıxarılıb.
Xatırladaq ki, kəlağayı 2014-cü ildə UNESCO-nun Qeyri-Maddi Mədəni İrs Siyahısına daxil edilib. Bu festival həmin hadisənin 10 illiyinə həsr olunmuş ilk festivalın davamıdır.
Məqsəd milli dəyərlərimizi yaşatmaq və gələcək nəsillərə ötürməkdir.
