Azərbaycanın aparıcı İKT şirkəti "Azerconnect Group" MDB regionunda ilk dəfə süni intellekt əsaslı yeni nəsil radio şəbəkələrinin inkişafı üzrə alyansa - AI RAN Alyansına qoşulub.
NVIDIA, Nokia, Samsung və digər nəhəng şirkətlərin də üzv olduğu qlobal platforma mobil şəbəkə infrastrukturunu süni intellekt texnologiyaları əsasında təkmilləşdirərək daha ağıllı, çevik və səmərəli şəbəkə arxitekturaları formalaşdırır.
Alyansa qoşulmaqla "Azerconnect Group" süni intellekt əsaslı mobil şəbəkə sahəsində qlobal texnologiyalara çıxış imkanlarını genişləndirəcək. GPU əsaslı radio emalı və süni intellekt dəstəkli RAN alqoritmləri şəbəkə dayanıqlılığını və spektr səmərəliliyini artıracaq.
Eyni zamanda, ağıllı enerji optimallaşdırma həlləri şəbəkə əməliyyatlarında səmərəliliyi təmin edəcək və şirkətin dayanıqlılıq hədəflərini dəstəkləyəcək. AI-RAN Alyansına üzvlük 6G texnologiyalarına hazırlıq strategiyasında mühüm mərhələdir.
Üzvlük yerli mütəxəssislərin innovativ texnologiyalardan yararlanma imkanlarını artıracaq. Əməkdaşlar beynəlxalq işçi qrupları ilə birbaşa əməkdaşlıq edəcək, texniki sessiyalarda iştirak edəcəklər.
