AzerGold QSC, Prezident İlham Əliyevin 20 aprel 2026-cı il tarixli Fərmanı ilə təsdiqlənmiş qeyri-filiz faydalı qazıntı yataqlarının istismarı üçün fəaliyyətə başlayıb. Fərmana əsasən, Bakının Qaradağ rayonu, Abşeron, Zaqatala, Balakən, Oğuz və İmişli rayonlarında yerləşən əhəngdaşı və qum-çınqıl yataqları şirkətin istifadəsinə verilib.
Şirkət daxilində yaradılmış operativ İşçi Qrupu artıq fəaliyyətə başlayıb. Eyni zamanda, vəzifələrin çevik icrasını təmin etmək üçün müvafiq təşkilati struktur formalaşdırılır. İşçi Qrupu səmərəliliyi artırmaq və bazar tələbatını ödəmək məqsədilə qısa müddətdə tədbirlər planı hazırlayıb.
Ekologiya və Təbii Sərvətlər Nazirliyi yanında Dövlət Mineral Xammal Ehtiyatlarından İstifadə Agentliyinin nümayəndələri ilə görüşlər keçirilib, sahələrə səfərlər təşkil olunub. Monitorinq zamanı texniki əlçatanlıq, infrastruktur, logistika, relyef və ətraf mühit təhlil edilib.
Bakının Qaradağ rayonu və Abşeronda yerləşən Güzdək muldası üzrə kəşfiyyat işlərinə başlanılıb. İyun ayından etibarən İmişli yatağında da işlərə start verilməsi planlaşdırılır. Şimal-qərb bölgəsindəki Zaqatala, Balakən və Oğuz yataqları isə növbəti mərhələdə istismara veriləcək.
Bu yataqların Bakıdan uzaqlığı, məhdud infrastruktur və logistika xərcləri iqtisadi səmərəliliyə təsir göstərir. Buna görə də, Fərmanda nəzərdə tutulan güzəşt mexanizmlərinin tətbiqi hasilatın təşkili üçün əsas amildir. AzerGold dövlət şirkəti olaraq mənfəətlilik prinsipi ilə fəaliyyət göstərir.
Qeyd edək ki, bu Fərman qeyri-filiz sektorunda institusional islahatların davamıdır. Məqsəd idarəetmənin şəffaf, çevik və səmərəli təşkilidir. 2027-ci ildən etibarən icazə, ekspertiza və hərrac prosesləri Rəqəmsal ekologiya sistemi üzərindən bir pəncərə prinsipi ilə aparılacaq. Bu, prosedurları sadələşdirəcək, nəzarəti gücləndirəcək və rəqəmsallaşmanı təmin edəcək.
Əvvəlki islahat çərçivəsində 2025-ci ildə AzerGold Boston Consulting Group ilə əməkdaşlıq edərək 70-dən çox yatağı tədqiq edib. Təhlillər əsasında institusional idarəetmə və normativ-hüquqi bazanın təkmilləşdirilməsi təklifləri Nazirlər Kabinetinə təqdim edilib.
