Mayın 18-də "Bolt" şirkəti "Sea Breeze Resort"da ilk Azərbaycan Təhlükəsizlik Konfransını təşkil edib.
Tədbirdə dövlət qurumlarının nümayəndələri, o cümlədən Təhsil Nazirliyi, Rəqəmsal İnkişaf və Nəqliyyat Nazirliyi, AYNA, AZCON, İqtisadiyyat Nazirliyi və KOBİA, sürücü tərəfdaşlar və tələbələr iştirak edərək yol təhlükəsizliyi və təhlükəsizlik standartlarının inkişafı mövzularını müzakirə ediblər.
Konfransın əsas məqsədi Azərbaycanda yol təhlükəsizliyi sahəsində maarifləndirməni artırmaq, dövlət və özəl sektor arasında əməkdaşlığı gücləndirmək və təhlükəsiz mobillik standartlarının inkişafına töhfə vermək olub.
Tədbirin moderatorları "Bolt"un regional dövlət əlaqələri üzrə meneceri Yuliya Maliç və "Bolt for Business" üzrə baş meneceri Salman Babazadə olublar.
Açılışda çıxış edən "Bolt"un dövlət əlaqələri üzrə direktoru Tom Tuksvort şirkətin təhlükəsizlik və uyğunluq sahəsindəki təşəbbüslərindən danışıb.
O, Azərbaycanda tətbiq olunan təhlükəsizlik həllərinə də toxunub: hər səfər sürücünün selfi təsdiqi ilə başlayır, bütün səfərlər real vaxt rejimində izlənilir və həm sürücülər, həm də sərnişinlər üçün tətbiqdaxili SOS funksiyası mövcuddur.
"Bolt"un məlumatına görə, platformadakı səfərlərin 99.9%-i heç bir təhlükəsizlik insidenti qeydə alınmadan tamamlanır. Sərnişinlərin təxminən yarısı səfər paylaşımı funksiyasından istifadə edir, 400 mindən çox istifadəçi "etibarlı əlaqəli şəxslər" funksiyasını aktivləşdirib, audio səfər qeydi funksiyasının istifadəsi isə 40%-dən çox artıb.
AMAK-ın prezidenti Vüsal Rəcəbli yol təhlükəsizliyi mədəniyyəti, sürücü davranışları və maarifləndirmənin əhəmiyyətini vurğulayıb. AZCON-un sistem direktoru Samir Əliyev isə mövcud çağırışlardan danışıb.
Tədbir çərçivəsində "Qlobal Platformalarda təhlükəsizlik sahəsi" adlı sessiya keçirilib. Sessiyada "Bolt" nümayəndəsi Ketrin Merser, qadın sürücü Gülnaz Kazımzadə, "AmCham" Təchizat Komitəsinin sədr müavini Maarifə Paşayeva və AMAK-ın direktoru Vüsal Rəcəbli iştirak edib.
Maarifə Paşayeva "Bolt"un "Video müşahidə" təhlükəsizlik həlli barədə məlumat verib: sərnişinlər səfərin 360 dərəcəlik videosunu yaxınları ilə paylaşa bilir, xüsusi təhlükəsizlik komandası isə fövqəladə hallarda operativ reaksiya göstərir.
Konfransda "Bolt Azərbaycan"ın baş meneceri İlkin Zeynallı və "Sabah.Hub" İnnovasiya Mərkəzinin İdarə heyətinin üzvü Orxan Abbasov arasında memorandum imzalanıb. Əməkdaşlıq innovasiya, təhsil və təhlükəsizlik istiqamətində birgə təşəbbüsləri əhatə edir.
2025-ci il üzrə ən peşəkar və təhlükəsiz xidmət göstərən sürücü tərəfdaşlar "Bolt Academy" çərçivəsində mükafatlandırılıb. Həmçinin yol təhlükəsizliyi mövzusunda tələbələrarası müsabiqədə fəal iştirak edən tələbələrə sertifikat və hədiyyələr təqdim olunub.
