Mingəçevir Dövlət Universiteti (MDU) və Türkiyənin Dokuz Eylül Universitetinin birgə təşkilatçılığı ilə keçirilən "Dil, Təhsil, Tədqiqat və Dayanıqlılıq Sahəsində Müasir Problemlər" mövzusunda Beynəlxalq Elmi Konfrans uğurla başa çatıb.
Tədbirdə Milli Məclisin deputatları, şəhər rəhbərliyi, hüquq-mühafizə orqanları, YAP, Bələdiyyə, Elm və Təhsil Nazirliyi yanında İctimai Şura və nüfuzlu elm qurumlarının təmsilçiləri iştirak edib. Qonaqlar arasında Afət Abbasova, Birol Akgün, Ufuk Turqaner, Recep Öztop, Hayrettin Özçelik, Mahirə Hüseynova və xarici alimlər var idi.
Mayın 18-19-da keçirilən konfrans 23 ölkədən 77 ali təhsil və tədqiqat institutunu təmsil edən 545-dən çox elmi məruzə və tezislə yadda qalıb.
Dilçilik, təhsil və tədqiqat sahələrində aktual çağırışlar müzakirə edilib, müasir yanaşmalar və innovativ metodlar ön plana çıxıb. Gənc tədqiqatçıların fəal iştirakı yeni əməkdaşlıq əlaqələrinə yol açıb.
Kitab sərgisi, bədii proqramlar və tələbə çıxışları elm və mədəniyyətin vəhdətini göstərib. Konfrans dil, təhsil və tədqiqat sahələrində davamlı inkişafa töhfə verib.
