Mayın 23-də "Olivia"nın təşkilatçılığı ilə ölkənin ən böyük gözəllik festivalı "Olifest" keçirilib. Festival ilk gündən minlərlə insanı bir araya gətirərək Bakıda gözəllik, əyləncə və musiqinin ritmini yaradıb.
Gün ərzində festival ərazisində yaşanan hərəkətlilik tədbirin təkcə gözəllik həvəskarları üçün deyil, ailələr, gənclər və şəhər sakinləri üçün də maraqlı görüş məkanına çevrildiyini göstərib.
Festivalda müxtəlif kosmetika və baxım brendlərinin sərgi zonaları, hədiyyəli oyunlar, fotozonalar, musiqili atmosfer və interaktiv aktivliklər təşkil olunub. Qonaqlar brendlərin məhsulları ilə yaxından tanış olub, yenilikləri sınaqdan keçirib və hədiyyələr qazanıblar.
Dermatokosmetoloq Günay Mikayılova düzgün dəriyə qulluq rutini ilə bağlı çıxış edib. O, gündəlik baxım zamanı ən çox edilən səhvlər, dəri tipinə uyğun məhsul seçimi, təmizləmə və nəmləndirmə mərhələlərinin əhəmiyyəti barədə iştirakçılara faydalı tövsiyələr verib.
Günün əsas qalibi "Olivia" tərəfindən təqdim olunan 500 manatlıq hədiyyə kartını qazanıb. Saat 18:00-dan sonra səhnəyə çıxan Murad Arif enerjili ifası ilə festival iştirakçılarına unudulmaz anlar yaşadıb.
Festival bu gün də davam edir. Mayın 24-də vizajist Vəfa Həmzəyeva makiyaj sirləri haqqında danışacaq, gecənin finalında isə Xalq artisti Aygün Kazımova səhnəyə çıxacaq.
