Azərbaycanın lizinq bazarının aparıcı oyunçusu "Prior Leasing" ASC ilk istiqraz emissiyasını uğurla başa çatdırıb. 1 milyon manatlıq istiqrazlar Bakı Fond Birjasında tam yerləşdirilib.
Abunə yazılışı (31 mart - 29 aprel 2026) ərzində 56 investor tərəfindən 56 sifariş daxil olub və hamısı icra edilib. Sifariş verənlər arasında fərdi investorlarla yanaşı, banklar, sığorta şirkətləri və korporativ investorlar da var.
Bu uğur həm institusional etimadı, həm də dövlət təşviqlərinin təsirini göstərir. Açıq yerləşdirmədən gəlirlərin vergidən azad edilməsi və Mərkəzi Bankın dəstəyi ilə kapital bazarı canlanır.
İstiqraz göstəriciləri:
- Ümumi həcm: 1.000.000 AZN
- Sayı: 10.000 ədəd
- Nominal: 100 AZN
- İllik gəlir: 15%
- Müddət: 1 il
- Kupon ödənişi: Aylıq
- ISIN: AZ2001019531
- Anderrayter: "Assist Finance İnvestisiya şirkəti" ASC
Toplanan vəsait lizinq portfelinin genişləndirilməsinə, xüsusilə kənd təsərrüfatı texnikası, suvarma sistemləri və sənaye avadanlıqlarının maliyyələşdirilməsinə yönəldiləcək.
"İlk istiqraz emissiyamıza həm pərakəndə, həm də institusional investorların marağı strategiyamızın düzgünlüyünü təsdiqləyir" deyən "Prior Leasing" ASC-nin baş direktoru Araz Səfərli əlavə edib: "15% illik gəlir və aylıq kupon ödənişləri etibarlı maliyyə alətidir. Gələcəkdə daha innovativ həllər və yeni emissiyalar planlaşdırırıq."
İstiqrazlar təkrar bazarda anderrayter və ya BFB platformaları vasitəsilə əldə edilə bilər.
"Prior Leasing" ASC kənd təsərrüfatı texnikası, sənaye avadanlıqları və nəqliyyat vasitələrinin lizinqi üzrə ixtisaslaşmışdır. Şirkət "New Holland", "Maschio Gaspardo", "Lovol", "Solis" və "Vaderstad" kimi beynəlxalq brendlərlə əməkdaşlıq edir.
