Hatayın küçələrində gəzərkən iki fərqli zaman qarşılayır insanı: 2023-cü il zəlzələsinin izləri və minilliklərə meydan oxuyan qədim şəhərin ruhu. Necmi Asfuroğlu Arxeologiya Muzeyi bu iki zamanın qovuşduğu nöqtədir.
Muzey təsadüfən kəşf edilib. 2009-cu ildə hotel tikintisi üçün qazıntı aparılan zaman qədim şəhər qalıqları aşkarlanıb. Layihə dəyişdirilərək ərazi muzeyə çevrilib. Beləliklə, tarixlə birlikdə yaşamaq seçilib.
Muzeydə 2300 illik tarix göz önünə sərilir. Makedoniyalı İsgəndərin sərkərdəsi I Selevkos tərəfindən əsası qoyulan şəhərin Roma, Bizans və Osmanlı dövrlərinə aid qatları ardıcıllıqla izlənilir.
Ən böyük təəssüratı mozaikalar yaradır. Dünyanın ən böyük təkparça döşəmə mozaikası buradadır - 1050 kvadratmetr. IV əsrə aid bu mozaika zəlzələlərin və çayların izlərini daşıyır.
Pegasus mozaikası 162 rəng çaları ilə diqqət çəkir. Mifologiyada azadlıq və sərhədləri aşmaq istəyinin rəmzi sayılır.
Apollon və Dəfnə əfsanəsi Hatayın Harbiyə bölgəsində baş verib. Yerli sakinlər hələ də şəlalələrin Dəfnənin göz yaşları olduğuna inanır.
2023-cü il zəlzələsi şəhəri dağıtsa da, muzey ayaqda qaldı. Zəlzələ həm də yeni arxeoloji tapıntıların üzə çıxmasına səbəb oldu.
Muzey ziyarətçini keçmişə aparmaqla kifayətlənmir, bu gün haqqında düşünməyə vadar edir. İnsan ömrü qısa, şəhərlərin ömrü uzun, mədəniyyətin ömrü isə minilliklər qədərdir.
