ABŞ administrasiyası Çaqos arxipelaqının Mavrikidən satın alınması imkanını nəzərdən keçirir.
Bu barədə "The Daily Telegraph" qəzeti mənbələrə istinadən məlumat yayıb.
Vaşinqton Hind okeanında ABŞ-Böyük Britaniya hərbi bazasının yerləşdiyi Çaqos arxipelaqı üzərində nəzarəti gücləndirmək niyyətindədir. Məqsəd bölgədə Çinin təsirinin artmasının qarşısını almaqdır.
Bu addımdan əvvəl ABŞ Böyük Britaniya ilə Mavriki arasında arxipelaqın suverenliyinin ötürülməsi barədə razılaşmanı təsdiqləməlidir.
2025-ci ildə Böyük Britaniya və Mavriki Çaqos arxipelaqının Mavrikiyə qaytarılması ilə bağlı razılaşma imzalayıb. Sazişə əsasən, Dieqo-Qarsiya adasındakı ABŞ-Böyük Britaniya hərbi bazası 99 il müddətinə fəaliyyət göstərəcək.
Çaqos arxipelaqı tarixən Mavrikinin tərkibində olub. 1965-ci ildə Böyük Britaniya tərəfindən ayrıca inzibati ərazi kimi ayrılıb. Daha sonra ABŞ Dieqo-Qarsiyada hərbi baza yaradıb və yerli əhali köçürülüb.
